Васильева Елизавета Фёдоровна

Васильева Елизавета Фёдоровна, — чăваш чĕлхин тĕпчевçи, филологи ăслăлăхĕсен кандидачĕ, доценчĕ, Чăваш Енĕн тава тивĕçлĕ вĕрентӳ ĕçченĕ 1934 çулхи пуш уйăхĕн 1 Чăваш Енĕн Элĕк районĕнчи Ярхуньушкăнь ялĕнче çуралнă.

Пурнăçĕ

1950—1954 çулсенче Чăваш патшалăх педагогика институчĕн чăваш чĕлхипе литература уйрăмĕнче вĕреннĕ. 1954-1959 çулсенче Елчĕкри вăтам шкулта вырăс чĕлхипе литературине вĕрентнĕ. Чăваш патшалăх педагогика институчĕн чăваш чĕлхипе литература кафедринче аслă лаборант (1959—1967), Чăваш патшалăх университечĕн чăваш чĕлхипе литература кафедринче аслă лаборант, чăваш чĕлхи кафедринче ассистент пулса ĕçленĕ (1971—1981). 1982 çулта «Лексические синонимы в чувашском языке» темăпа кандидат диссертацине хӳтĕленĕ. Чăваш чĕлхи пĕлĕвĕн кафедрин доценчĕ (1983—1996). 1996 çултанпа Чăваш патшалăх педагогика университечĕн филологи факультетĕнче вăй хурать: хальхи чăваш чĕлхипе авалхи тĕрĕк чĕлхине, тĕрĕк чĕлхисен танлаштаруллă грамматикине вĕрентет.

Елизавета Васильева наукăпа тĕпчев ĕçĕсем нумай енлĕ: пĕтĕмĕшле тюркологи ыйтăвĕсем, лексикологипе лексикографи, пуçламăш, вăтам тата аслă шкулсенчи чăваш чĕлхин методики, чĕлхе культури, чăваш литература чĕлхин историйĕ.

Ĕçĕсем

• Пуçламăш классенчи ачасен чĕлхине аталантарасси. Шупашкар,1981;
• Синонимсен словарĕ. Шупашкар, 1983;
• Татарский язык. Чебоксары, 1988.
• Пайăр ятсем /Чувашская ономастика/. Шупашкар, 1991.
• Хальхи чăваш чĕлхи. Практикум. Шупашкар, 1994;
• Омонимсен словарĕ. Шупашкар, 1996 (тепĕр авторпа пĕрле);
• Тематический русско-чувашский словарь. Чебоксары, 1998 (тепĕр авторпа пĕрле);
• Русско-чувашский словарь. Чебоксары, 1999 (тепĕр авторпа пĕрле);
• Александра Семеновна Канюкова: к 80-летию со дня рождения.Биобиблиографический справочник. Чебоксары, 1999 (тепĕр авторпа пĕрле);
• Хальхи чăваш чĕлхи.Фонетика.Орфоэпи.Графика.Орфографи. Шупашкар, 2001.
• Хальхи чăваш чĕлхи.Лексикологи. Фразеологи. Лексикографи. Шупашкар, 2002 (тепĕр авторпа пĕрле);
• Самоучитель турецкого языка. Чебоксары, 2002.
• Самоучитель чувашского языка. Чебоксары, 2003.
• Картинный турецко-чувашский словарь. Чебоксары, 2003.
• Удмуртско-чувашский словарь. Чебоксары, 2003.
• Тернистый путь. Чебоксары, 2004.

Литература

• Елизавета Федоровна Васильева: к 65-летию со дня рождения. Чебоксары, 1999 (составитель А.А.Сосаева);
• Васильева Елизавета Федоровна // Чувашская энциклопедия. Том 1. А-Е. Чебоксары, 2006. С.287.